今日經濟日報有油塘邨第四期 (商場) 既幾張相，外型我第一眼望落，諗起既係慈雲山中心。
房署話引入幾樣環保設施，包括採用混合式通風系統，每年有四個月引入自然風、採用水冷式空調系統 (即係用水塔冷卻) ，貯水會消毒過 (因為水塔冷卻容易滋生細菌, 所以要消毒) ，同埋空調冷凝水會用黎灌溉；同埋天台會綠化 (呢個慈雲山中心三樓、五樓同七樓已經做緊, 所以我話呢個project 似慈雲山中心)
個商場樓高八層，一樓會做公共交通交匯處，仲會將附近既過境巴士站搬埋入去，三樓係停車場，二樓定係四樓會有的士站，而商舖就會響二樓及四樓至七樓，八樓就做天台花園；向油塘地鐵站果邊會有雙層購物廊接駁地鐵站，而雙層購物廊既頂部就做天台花園; 至於之前同領匯合作時話會起購物天橋接駁至東隧入口住宅項目，響呢幾幅圖度睇唔到有，似乎已經放棄左。
房署總建築師話，商場外貌同佈局構思係來自開埠開期鯉魚門既石礦場 (我第一時間諗起朗豪坊！)，「利用疊石錯落既形態創造如岩石般的立體造型；斷裂切面及紋理，更可營造新的視覺效果」，同埋,，佢以前曾經響鯉魚門食飯，「望著飛機升降，感受極為震撼」，所以佢「希望日後商場內亦保留這種元素, 特別是商場頂部平台，可以有類似區內海鮮食店的布局」。
商場預計服務人口，除左油塘區內八萬人口 (應該冇預計油塘工業區重建後人口)，仲包括港島、將軍澳、九龍中部地鐵沿線顧客，以及到鯉魚門觀光旅客。
睇晒成頁報導後，我有幾個疑問：首先，佢果個混合式通風系統係咪真係有效？商場對正油塘工業區，如果要打開天窗／幕牆引入天然風，果D 風有冇過濾呢？係咪真係適合直接引入商場呢？其次，油塘工業區第時重建時，會唔會有好多沙塵呢？重建後，新建築會唔會阻擋左天然風呢？即係話，呢個混合式系統會唔會只係得幾年可以引入到天然風，之後就畀前面既樓宇阻擋呢？另外，睇模型好似唔覺有冷卻水塔，唔知個水塔會放響邊呢？
另外，呢位總建築師話希望商場頂部平台有類似區內海鮮食店既布局，但睇模型圖唔覺有預留空間。希望佢唔係得個諗字。
此外，呢個設計響地鐵站上蓋係天台花園，似乎冇考慮過起有蓋商舖去連接東隧出口地盤屋村, 我覺得好可惜, 佢邊應該有大約十幾幢樓, 如果果邊起商場，一來會分薄客源，二來果邊個商場未必生存到；唔起商場又對果邊既住宅群帶來不便。老實講，我個人會傾向原設計中連接東隧出口地盤既購物走廊。當然，佢可以將天台花園部分空間整成購物走廊。
此外，我唔知房署有冇諗過未來既競爭者。冇錯，呢個商場係有近地鐵站既地理優勢，但如果海邊有商場，可能會更加吸引到遊客，最少響海濱一邊欣賞日落一邊食野, 點都好過響一個周圍畀大廈圍住既公園仔度食野。
沒有留言:
張貼留言