逛Elements(圓方)後感

地鐵公司不斷宣傳Elements會響十月一日開幕，所以網主趁國慶假期去左呢個商場度行。

最初睇到呢個商場中文名係八月左右，響港外線碼頭見到佢既宣傳橫額，英文名叫"Elements"都叫做配合商場五行元素，但中文名叫「圓方」就有點不倫不類了。（正如H cube中文名「立坊」唔襯英文名）據講「圓方」係同風水有關喎 ....

睇到Take Me Home話紅磡有免費穿梭巴去Elements，行到去個站時係16:05 ，以為剛剛走左班車，於是去黃埔行左一陣，點知返到去個站頭見到冇晒人，結果等左差唔多半粒鐘先有車。以為黎既係小巴，點知原來係一架旅遊巴，架車計埋我得五個人搭，響黃埔轉左一輪（要調頭上紅磡道）後就上紅磡繞道，塞左少少車後就到佐敦，去到佑寧堂係冇人搭的，結果冇埋站就直去九龍站，似乎地鐵高估呢條線？要讚下個司機，幾好禮貌，乘客落車亦會叫人小心梯級。

以為架穿梭巴停響商場門口，原來佢停響九龍站個公眾落客站度，架車轉入去時我見中間位好多建築廢料，我都唔知係邊個責任了。好心就搵人執下佢啦，果個位係的士轉入去必經的，D 遊客見到實會影響香港形象的。

入在九龍站唔多見指示點去Elements，所以我諗住行下先，兜左去東涌線入閘處後見到有兩個counter ，一個係顧客服務處，響路中心的，另外一個響牆邊好大個的係禮賓處，每邊都擺左唔少人，似乎顧客服務處係做八達通增值、泊車優惠 (唔肯定有冇) 但老實講，我唔知兩者有乜分別，亦唔明點解要分兩個counter 。但不得不佩服佢肯投放咁多資源響顧客服務，成個場有最少四個counter ，每個counter每一更最少有三個人（一樓入口近南停車場果個counter 除外），每月開支都唔少野。一樓入口近南停車場果個counter後面有梳化，但個counter 我唔知係做乜的，又冇任何label，我只係見到有個姐姐仔同一個可能係保安既人一齊，估計用途可能係迎賓。

去到東涌線入閘處果邊抬起頭望就望到Elements了，原來佢響九龍站上面的，我仲以為係響九龍站四至七期平台（事實上凱旋門平台下面有一部分係Elements），先沿扶手梯上一樓，見到成個場都好多人，尤其Three Sixty 入面都幾迫下，所以唔行住，行前少少見到好多地磚都花晒，我估係冇做好保護地磚, 真係令成個場cheap左好多，天花邊位有唔少地方髹過界同未髹的，商場擺設裝飾有部分亦係花左同收口差，我諗執漏都有排執。 (我都唔明點解可以咁都收貨的)

正如宣傳所講，商場分五行元素（金、木、水、火、土區），但商場部分裝飾唔係太配合五行元素，二樓好D ，一樓就唔係咁好了。地板顏色亦唔算可以突出每一區既分別，天花更加係一式一樣。指示牌只係指示去邊D 區，同埋附近建築物、交通，仲有係戲院同溜冰場，但對於好多顧客黎講，呢D 五行分類根本唔重要的，顧客比較關心店舖種類，例如食肆響邊頭，但呢個五行分類就唔係太清淅了，例如水區話係「國際食肆」，但Agatha、M.A.C 、H & M 、Zara又響水區內，王家沙係食肆但響土區（根據資料，土區係「各國潮流服務」）、另外仲有間Wooloomooloo Steakhouse響木區（木區係「健康、美容服務、時尚品味、健康生活概念）另外仲有金區係「名牌及世界級食肆」。仲有好多其他例子，唔舉例了，我覺得咁樣分區法非常混亂，亦浪費左「五行」呢個概念。（佢將溜冰場放響火區，理由係火區係「娛樂地帶」，真古怪。冰放火區，哈！）

商場另一個賣點係一千萬豪裝十個靚洗手間（應該係十男十女仲有傷健洗手間同埋育嬰室？）又話等候區有真皮梳化加雜誌，又話男廁送鬚刨同鬚後水而女廁送香水，去到有D 失望，首先，唔係個個洗手間都有等候區的，雜誌架設計亦太失敗了，有四層但每層承托雜誌只係靠一條鐵，好難先放到一本雜誌，就算放到都卷曲晒本雜誌，而雜誌附送的小冊子亦跌埋出黎，我見到有幾本雜誌直頭係打側擺的，真係好肉酸。廁所設施又係麻麻地，洗手盤用自動龍頭但個感應器感應位置太差了，有幾個要伸到好前先感應到，一洗手D 水會流去洗手盤前面而唔係流入流手盤。此外，洗手液同抹手紙收響鏡後，但個開口做得又低又入，我見好多人都要彎腰先睇到洗手液同埋抹手紙位置的，我都唔知建築師究竟有冇用過呢D 洗手間，點解會有D 咁既設計。如果女士用，要彎低身會唔會走光呢？廁格入面有一個好有趣既設施，就係廁板清潔液！如廁前先按掣，廁格側邊的清潔液機就會噴出清潔液響廁板上，然後使用者需要使用（清潔液機側邊既，又或用隨身的？）廁紙清潔廁板。可能外國早已有呢樣野，我響香港就第一次見，因為我行過某D 商場，洗手間有提供坐廁墊的，我冇諗過會有DIY 清潔裝備。

商場位置響九龍站上蓋，可能因為地鐵既關係，所以商場係唔可以直通去西隧口巴士站的，真係可惜。另外，一樓近君臨天下果邊係向住西九龍文娛藝術區的，果個位有條行人通道去君臨天下，向西九係落地玻璃，我估可能第時會有天橋駁去西九。另外，睇商場單張話Three Sixty 對出有扶手電梯落巴士總站（同埋小巴站），但去到發現係圍板。

商場單張分兩種，一種係食肆，另一種係一般購物的。我覺得，既然地鐵覺得商場交通唔係咁方便，應該響單張度介紹埋商場地理位置同有乜交通工具。商場網頁亦係不知所謂，宣傳片仲多過商場介紹；睇店舖名單，捲動時畫面會花；網頁亦冇商場平面圖，特式介紹（包括五行元素概念同豪裝洗手間），亦冇講點樣由各區前往商場，更加冇講商場活動、服務同優惠。

商場一樓同二樓樓層間中空位置，有部分係白色凹凸形的，呢D 野係好睇唔好洗，到要做清潔時真係好煩。

講完設施講商舖，商場一樓有Three Sixty 超市，呢個係牛奶公司旗下既高檔超市，賣有機產品的，比置地廣場的大好多。另外響地下柯士甸西路入口就有溜冰場，橢圓型的，好近商場入口，而因為溜冰場用八達通收費，所以唔似一般溜冰場咁閘左好多位，佢只響溜冰場出入口先要畀錢，外圍地方都係開放的，而且佢引入好多環保概念，收費係逐分鐘計，每分鐘一蚊，收費比其他溜冰場靈活。但溜冰場宣傳有一百八十度維港景睇，似乎誇大了。首先，溜冰場只有向大門口果邊先有落地玻璃，其次，溜冰場響地下，可以望到既景觀有限，第時西九龍文娛藝術中心起好後都唔駛望了。溜冰場對上係戲院，據講十月十八日做首映，十一月初先正式開幕，所以唔知佢設備係點，佢而家響度招收會員，會員可以響呢間The Grand Cinema、4D超立體巨幕影館、MCL JP銅鑼灣、康怡同埋將軍澳戲院享受優惠，但我本身係百老匯的會員，所以我唔會申請了。戲院對面有間賣英文書的店舖，都算大，但我今日冇乜心情睇英文書，行過就算了。金區係名牌子，如Versace 、上海灘、Prada 等等，仲有HMV （呢個唔係響金區）其中有部分舖頭係兩層的，佔據一樓同二樓，幾有趣。名牌子令我諗起ifc mall。要講下周生生、呢間舖既裝修我幾鍾意，黑色，入面有卡位畀人睇首飾。另外，Valentino 的門面裝修亦幾吸引，我見有唔少人影相的。

HMV 上兩層係金區既食肆，其實係一個露天既「演薈廣場」，四周畀一堆食肆包圍，呢個我唔係太欣賞，可能佢會玩露天茶座，但唔該響舖前加返D 蓋啦，就算係透明既都好丫！由扶手梯、升降降機推門行出去完全係冇蓋的，落雨果陣就算行去最近扶手梯入口果間都要濕身。另外，佢D 玻璃同玻璃門全部都冇黐腰線的，到時有人撞到玻璃、玻璃門就可以向佢地索償了。另外，要彈下佢金區果個位既升降機，升降機槽係透明的，一樓升降機後係行人通道，再後面係人工瀑布，但條人工瀑布放響呢個位實在係太浪費了，只得搭升降機既人先欣賞到，但響升降機既人又點會聽到水聲呢？而一樓行人通道又唔夠闊，冇足夠空間欣賞呢條人工瀑布。

總括黎講，我覺得呢個走高檔路線既商場有少少眼高手低。

參考資料：
Elements網站 (http://www.elementshk.com)
Take Me Home西九龍版2007年9月28日出版第102期(http://www.takemehome.com.hk)